Forum 2.0

Antwoord op... LYDENSTYD

Ek vier Lydenstyd.

Paasfees - die jaarlikse herdenking van die kruis van Jesus - is die eerste fees wat Christene gevier het en bly die belangrikste fees. Mettertyd het die kerk 'n voorbereidingstyd begin hou voor Paasfees, wat 'n tyd van vas ingesluit het. By die Konsilie van Nicea (325 nC), waar die leerstuk oor die Drie-Eenheid geformaliseer is, was dit reeds 'n instelling. Met die verloop van tyd is die vastyd vasgemaak op 40 dae voor Paassondag.  Die 40 dae sluit die Sondae uit en begin altyd op 'n Woensdag, wat "Aswoensdag" genoem word. Van Aswoensdag tot Paasfees word dan die Lydenstyd (of Vaste, in Engels Lent) genoem en dit word tradisioneel op 'n sekere manier gevier, wat hieronder genoem word.

Ek het persoonlik (soos meeste van ons) niks van hierdie goed geweet of trouens in geglo nie, dis immers "katoliek", né? Ag nee wat, as dit ouer is as ons verstaan van die Drie-eenheid is dit goed genoeg vir my.  Die Katolieke het dit inderdaad nog al die tyd gevier, maar met die jare het al hoe meer Protestante dit gevier en vandag word "Lent" algemeen deur Christene regoor die spektrum gevier. Die laaste jare leef ek geestelik met groter ritmes, omdat ek agterkom dat dit goed vir my is om in daaglikse, weeklikse en jaarlikse ritmes te wees.  Dit hou my by die belangrike dinge en stuur my weg van die willekeur van 'n "geestelike" lewe wat net oor my eie voordeel, behoeftes en impulse gaan.  Ek hou dus Lydenstyd al vir 'n paar jaar en vind dit is geestelik vir my die vrugbaarste tyd van die jaar

Natuurlik is dit nie noodsaaklike of verpligte dinge nie, dit is geen wet nie en die Bybel skryf dit nie voor nie. Dit is egter nuttig en opbouend.  In ooreenstemming met die Christelike gebruik vier ek Lydenstyd persoonlik soos volg (wat nie naastenby die omvang is waarmee dit in die ou kerke gevier word nie):

1. Lydenstyd is 'n vastyd. 

Die 40 dae slaan op Jesus se vas van 40 dae in die woestyn en ons vas is 'n simboliese meeleef met Hom in sy versoekings, sy verwerping en sy lyding.  Dit bly net 'n simbool, 'n teken - geen meriete nie.  Ek vas dus saam met die kerk van luukses soos lekkergoed en sjokolade, koffie, wyn, ens.  Ek vas soms ook een dag in die week vir 24 uur. Sondae is van die vas uitgesluit - halleluja - maar as jy reeds Vrydag wil halt roep, daar is nie 'n wet nie...

2. Lydenstyd is gebedstyd. 

Dit is 'n tyd om meer God se teenwoordigheid en wil te soek en dit moet mens maar doen soos jou dag jou toelaat.  My selfoon is steeds gestel op die daaglikse gebedsure, en dit help.  Die trant van gebed in die tyd is nederig en ondersoekend en die Here kan maar inspreek in wat nie reg is nie.  Dit gaan oor verootmoediging.  Ek journal nogal baie in hierdie tyd en het al baie gedigte en gebede geskryf.

3. Lydenstyd is dienstyd. 

Die doel is om meer liefde en welsyn te bewys en uit te reik.  Dit doen ek maar soos die geleenthede sig voordoen.  As ek iemand normaalweg dalk sou wegwys (mens kan net soveel keer per dag gee), dink ek ai, dis lydenstyd en soek dan maar vir iets om te gee.  Ek weet my benadering is nog maar baie effentjies.

Ja, so dis wat ek doen in Lydenstyd.  Die hele periode gaan oor in Lydensweek - die week tot en met Paasnaweek.  Dit begin met Palmsondag, en daarna is die hoogtepunte die Diens van Duisternis (Tenebrae) op Donderdag-aand, Goeie Vrydag, Stil Saterdag en Paassondag.  Die Here het opgestaan!

As jy wil deelneem, sal jy ook ervaar dat die Here in hierdie hele tyd vir jou naby is.

------------------------------------------------------------------------------------------------------------------------------

Meer oor Paasfees oor die algemeen: kliek hier

Laai die oordenkings wat Ds Trevor Hudson vir Lent geskryf hier af: kliek hier

Laai hieronder VEERTIG OORDENKINGS af wat by die Lydenstyd-tema pas. Kliek hier. Dis in jou Downloads-folder. 

En as jy wil kan jy my digsels en bidsels lees wat ek die laaste jare tydens Lydenstyd gemaak het. Dis op my blog: kliek hier.

You need to be a member of jimileroux30 to add comments!

Join jimileroux30

Email me when people reply –

Replies

  • Jimi, net vinnig 2 vrae:

    1) Waarvan vas jy alles op jou Donderdag 24-uur vas? En hoe kry jy dit reg om dit sinvol te benut midde in 'n werksweek?

    2) Enige idee's oor hoe mens 'n sinvolle As-Woensdagdiens/ byeenkoms kan inrig?

    Ek en van ons lidmate het ook verlede jaar hierdie 40-dae vas gedoen en dit was vir ons almal baie sinvol. Baie dankie vir jou sinvolle idee's in hierdie verband!

    • Haai daar Willem -

      1) Ek hou Woensdagaand na aandete op met eet en slaan Donderdag se ontbyt en middagete oor.  Ek drink wat ek wil (sans koffie en wyn).  Ek eet dan weer Donderdagaand.  Vroeër sou ek baie meer wetties gevas het, maar ek het geleer dat die Here regtig nie boekhou nie, dis meer vir my eie voordeel om met disciplines te leef.  Ek dink dis iets wat baie persoonlik is.  Jy moet iets vir jou laat werk.

      2) Die NGK het in sy liturgiese riglyne nogal oulike voorstelle - ek is nie so seker waar om dit elektronies te kry nie, ek sou dink Communitas se website sal help.  Mens kan uitvind wat doen Mosaiek - hulle doen elke jaar so iets.  Ettienne Booysen of Jacques Bornmann behoort te kan help.  Dit behels 'n as-kruis op die voorkop vir die wat wel, maar ek dink dis iets wat mens vir ons mense maar goed moet aanpas.  Sterkte!

This reply was deleted.