Forum 2.0

Vorige antwoord(e) op ... DEPRESSIE

 

Hierdie is net inleidende woorde uit die hoek van die geestelike begeleiding en nie bedoel om die komplekse toestand van depressie te omvat of te behandel nie.

Daar is verskillende soorte depressie:

  • Reaktiewe depressie – hierdie soort depressie is “normaal” (te verwagte) en die gevolg van dinge wat gebeur het (eksterne faktore) : verlies, trauma, frustrasie, ens.
  • Kliniese depressie is die gevolg van tekorte van breinoordragstowwe (veral serotonien) en reageer dikwels goed op SSRI’s (Selective Serotonin Re-uptake Inhibitors) soos Prozac of ander middels
  • Daar is ook die depressie wat die gevolg is van medisyne (as newe-effek) en ja, die negatiewe gevoelens wat die gevolg is van hormonale veranderinge (dalk nie depressie in die kliniese sin nie)
  • Daar is ook depressie van ’n laer graad, vroeër distimie genoem – ‘n lustelose, moedelose, tranerige gevoel wat oor maande net nie wil wyk nie (dokters skryf hiervoor ook SSRI’s voor)

Dan is daar ook ’n saak voor uit te maak om die verskynsel te beskryf sonder al die tegniese terme. Almal van ons ken moedeloosheid. Ons voel dinge gaan nêrens heen nie, verwagtinge realiseer nie, die hoop beskaam. Wat is die sin van alles? Waarheen gaan dit – hoe gaan dinge eindig? Sommige mense deel met soveel probleme en het soveel issues dat daar nie eintlik sprake is van joy in hulle lewe nie. ’n Gees van neerslagtigheid maak hom tuis in jou siel. Die Prediker is die Bybelboek wat hieroor deel – die skrywer Salomo (dikwels die sensitiewes en artistiekes onder ons wat so voel, nie waar nie?) is self depressief en vertel wat hom moedeloos maak. Die Bybel erken dus depressie as toestand en daar is nie die gedagte dat gelowiges nie depressief mag wees nie.

Daar is nog 'n vorm van depressie wat vandag voorkom: ons word hedendaags oorvloei met inligting en uitdagings. Ons kan nie alles hanteer nie – ons is net nie gemaak daarvoor nie. Die bombardering van ons brein met inligting lei tot ’n verhoogde staat van opwekking, en die brein pas daarby aan (habitueer). Dan het ons nog meer nodig om gestimuleer te word (soos verslawings werk). Die gevolg is dat mense vandag sukkel om werklik en diep te beleef, en ’n doodse gevoel ervaar. Alles moet meer en meer ekstreem word, anders kan jy dit nie meer beleef nie. Kinders sit voor die TV en huiswerk doen, i-Pod in die een oor, selfoon teen die ander oor, en speel tussendeur op die laptop of chat met ’n vriend. Anders is hulle “bored”. Sielkundiges noem dit anhedonie – die onvermoë om te voel of te beleef. Doodsheid van binne. Ek weet nie of jy so iets beleef nie. Die volgende fase is uitbranding. Depressie het in ons geslag so toegeneem dat een uit vier mense daaraan ly – veral onder vroue (ook baie onder tienermeisies).

Ja, natuurlik word jou geestelike lewe daardeur beïnvloed. Verwag om net nie lus te wees vir gebed, ens. nie. Om te voel niks is die moeite werd nie, God is afwesig, ens. Natuurlik is dit jou belewenis wat verander het, nie waar nie? Hy is steeds daar soos gister en eergister. Dis juis in ’n tyd soos die dat geestelike dissiplines – iets van ’n ritme in jou geestelike lewe – jou sal deurdra.

Hier is my advies:

  • Probeer vasstel hoekom jy so voel  – is dit chemies/hormonaal, of wat het gebeur of verander? Dink in die rigting van verhoudings en werk eerste...
  • Bid daaroor en journal jou gedagtes.
  • Gaan dokter of sielkundige toe en vra of jy kwalifiseer vir medikasie (hierdie tipe middels is baie veilig en is ook nie-verslawend [werk op ’n ander manier]). Dis ook geen skande nie.
  • Aanvaar die fase van die lewe waarop jy is – probeer bepaal wat die doelwitte van hierdie fase is.
  • Besluit om klein dingetjies doelbewus te geniet: beleef die geurige bad, die rooi om ’n wolk se rand, die reuk van die vuur, sulke dinge.
  • Doen mooi dinge vir ander mense as dissipline: glimlag vir iemand, gee meer, dien meer

Daar is nie baie wat mens vir iemand kan sê wat regtig erg depressief is nie, maar een ding bly ’n waarheid: dit gaan weer oor, dit kom meestal in episodes voor. Sien dit net deur. Groei daaruit – jy sal sterker anderkant uitkom.

Baie sterkte.

You need to be a member of jimileroux30 to add comments!

Join jimileroux30

Replies are closed for this discussion.

Replies

  • Baie dankie vir die insiggewende verduideliking van depressie daar is baie min mense wat werklik vertstaan hoeveel dit van n mens verg om depressie te bestuur om n normale lewe te probeer lei.my ma het my altyd haar sonskyn kind genoem want ek was in als n oorpresteerder. Wat ek vandag besef nie belangrik is nie' maar n mens besef dit eers as daar letterlik niks meer in jou is om vir die wereld te gee nie. Ek is deur n baie traumaties moterkaping terwyl ek huise verkoop het en was ses maande later genoodsaak om my besigheid se deure te sluit.
    Ek moes my enigste seun deur matriek kry wat ook maar n leerprobleem soos meeste seuns het en wat sportmal is. My man van twintig jaar kon nie met my meer cope nie. Ons is geskei. Ek was in en uit sielkundige inrigting want ek was regtig siek.

    Maar weet jy baie behandelinge medisyne bid nerfaf kniee en knoniese medikasie en so Getroue God. En ek is twaalf jaar verder. Ek sien alweer die son. My dierbare moeder is januarie oorlede wat verskriklik was. Ek en Nico is verlede Desember wee getroud. Ons seun is recci in spesmag reeds instrukteur en getroud met twee ou kleintjies. Depressie is n verskriklike siekte maar met die Here se krag en genade saam motiveer ek alweer elke dag mense om my . En my pad met die Here was al vir so baie mense wat ook swaar het en moedverkoor het n voorbeeld om weer op hulle kniee te kom en hulle lewe met ons dierbare Here reg te maak want net Hy kan ons pad reguit maak.
    Dankie vir jou leiding jy sal eendag baie robyne in jou kroon dra in die hemel.

    Jesus groete
    Ronelda Oosthuizenm
    • Hallo Ronelda - en diamante vir jou, wat deur dit alles aan die Here vasgehou het en nou OORWINNEND leef!  Jou getuienis sal 'n bemoediging wees vir elkeen wat hierdie blad lees - baie seën!

      • As ek net een mens se lewe kan beter maak deur my geloofspad Dan is my lewe die moeite werd.
This reply was deleted.